KRISIA

Krisi garaiak bizi ditugu. Ez dugu besterik entzun edo irakurtzen, monotema bihurtu zaigu aspaldian.

Einsteinek esan omen zuen, krisia pertsonek eta herriek izan dezaketen bedeinkapen onena dela, krisiak aurrerapenak dakarzkielako, krisirik gabe ez dagoelako sormenik. Krisirik gabe bizitza errutina omen.
Enpresa munduan ere antzeko mezuak entzun genituen krisia hasi aurretik. Orduan edonork irabazi omen zezakeen dirua erruz, ez omen zuen meriturik. Krisi bat etorriko omen zen, eta krisi hori gainditzen zuten enpresek merkatuaren hegemonia eskuraturik egoera askoz hobeago batean kokaturik aurkituko omen zuten euren burua. Krisia ona izango zela entzun genion enpresaburu askori.
Baina krisia gainean dugunean, azkenean “bedeinkapen” hori iritsi zaigun honetan, ez dirudi hain ona denik. Euren langileei mezu hura saltzen zieten berberak dira egun soldaten izozteak, lan-orduen gehitzeak, edo kaleratzeak erabakitzen dituztenak. Ez zuten fede askorik esaten zuten horretan…
Politikan ere sarri entzundako argumentua da argudio ekonomikoek azkartuko zutela gure independentzia prozesua. Espaniaren porrot ekonomikoak abagune polita suposatuko omen zuen gure herriarentzat, independentziaruntz bide zuzenetik eta 5. martxa sartuta ekiteko.
Baina gaur ikus dezakegu politikari haiek ere ez zutela fede askorik esaten zuten horretan. Mezu hura zabaltzen zuten berberak dira, Espainiaren porrot ekonomikoa gauzatzen ari den honetan, hura salbatzeko interes gehien azaltzen dutenak. Ahal duten erakunde español (udaletxe, diputazio, parlamentu…) gehienak salbatzeko konpromisoa erakusten dute. Gastuak kontrolatu, diru-sarrerak gehitu, eta zorra gutxitzen saiatu. Horra hor, independentzia bidean jarriko gintuen Españaren porrot ekonomikoan sakontzeko alderdi abertzaleek hartu duten bidea.
Krisien alde positiboak goraipatzeaz gain, beste hauek ere esan zituen Einsteinek eta gure ingurura begiratuz, tamalez arrazoia zuela esan beharrean gara:
Benetako krisia, inkonpetentziaren krisia da.
Ez dezagun espero gauzak aldatzea, beti berdina egiten jarraitzen badugu.
Print Friendly