AUTODETERMINAZIOAZ 10 PUNTU

(Iturria: Iparla. www.iparla.wordpress.com )

“Autodeterminazioa oinarrizko eskubidea da eta oinarrizko eskubideak ez dira bozkatzen. Independentzia politikoa eta nazionala dira autodeterminazio eskubidearen edukiak, inolako baldintzarik gabe”

1.- Oinarrizko giza eskubideak berezkoak, jatorrizkoak, berehalakoak, baldintza gabeak, jarraikiak, iraunkorrak, igorri ezinak, inalienableak, bazterrezinak eta preskribaezinak dira.

2.- Oinarrizko giza eskubideak askatasunaren eta demokraziaren osagaiak dira, eta beraz, ez dira bozkatzen, ez dira erabakitzen, ez eskatzen, ez ematen, ez baldintzatzen…ez dira hautatzeko gaia. Soilik gauzatu edo urratu egiten dira.

3.-Autodeterminazio eskubidea oinarrizko giza eskubidea da, herri guztiei berezkoa zaiena.

4.- Inperialismoa dagoen lekuan, oinarrizko giza eskubiderik ez dago. Herrien autodeterminazio eskubidea falta den lekuan (giza eskubideetan lehena eta beste guztientzat baldintza beharrezkoa) ez dago giza eskubiderik.

5.- Baldintzatutako autodeterminazio-eskubidea, kontraesan bat da berez, termino kontrajarriak dira baldintzak eta autodeterminazioa.

6.- Inperialismoaren aurrean askatasun berehalakoaren oinarrizko eskubidea da autodeterminazio eskubidea; independentzia politikoa eta nazionala ditu edukitzat, baldintzarik eta luzamendurik gabe.

 

7.- “Erabakitzeko eskubidea” deiturikoa ez da herri guztien autodeterminazio eskubidea beste era batera esanda; autodeterminazio kontzeptua esanahiz eta edukiz hustutzea baizik. Inperialismoaren errealitatea ukatzea da, erregimen menderatzailearen homologazioa lortzeko ahalegina.

8.-Inperialismoaren errealitatea ukatuz, ez dira kontutan hartzen gaurko okupazio erregimenaren oinarri diren errepresio, terrorismo, konkista etab. Erregimen horren barrutik abiatuko omen da gure autodeterminaziorako eskubidea. Hau da, gure herria ukatzen duten okupazio erregimenen zapalkuntza politiko, ekonomiko, demografiko eta ideologikoaren menpean determinatu behar omen dugu gure borondate nazionala.

9.- “Erabakitzeko eskubide” deiturikoarekin nazio okupatua eta zapaldua esistitzen dela ukatzen da, eta beraz, nazio erresistentziak ezin du horretan oinarritu. Ondorioz, independentzia nazionala ez da oinarrizko giza eskubidetzat hartzen; urrutiko asmo lauso eta hutsal bat bezala ulertzen da.

10.-Autodeterminazioa eta defentsa legitimorako eskubidea banaezinak dira, defentsarik gabeko  eskubidea ez baita eskubidea.

Print Friendly, PDF & Email
gureberriak
About gureberriak 139 Articles
Gure Berriak Euskal Herriaren independentziaren aldeko komunikabide bat duzue: herri gisa autoestimua indartu eta sendotzen laguntzeko tresna izan nahi duen komunikabidea; egunerokoan jasaten dugun kutsadura ideologikoaren aurkako sendagaia. Menpekotasunean dirauen herri baten seme-alabak gara, eta egoera horrek ezinbestean eragina du bizitzako arlo guztietan. Munduko beste edozein herriren antzera, eguneroko berriak ikuspegi propio batetik lantzea ezinbestekotzat daukagu. Guztiok politikarekin ezinbestean dugun lotura kontuan hartuz eta askatasun egarriak bultzatuta, webgunean topatuko duzuen material oro independentziarantz zuzendutako begiradapean jorratzea dugu helburu. .