Hitzaldi-ziklo polita antolatu du Orreaga taldeak Galdakaon, maiatzerako. Lau hitzaldi izango dira; bat hileko ostiral bakoitzeko. Torrezabal kultur etxean izango dira guztiak ere, eta arratsaldeko 7etan hasiko dira.
Lehenengoa, beraz, ostiral honetan bertan da, hilak 5. Eta ez da nolanahikoa izango. Izan ere, puri-purian dagoen gai batez arituko dira: zorioneko eskuaz, hau da, Irulegiko Eskuaz. Juan Martin Elexpuru filologo, idazle eta itzultzaileak egingo du hitzaldia.
Beste hiru hitzaldiek ere oso itxura ona dute (ikusi egitaraua). Hauek izango dira hizlariak: Oskar Aranzabal ekonomialaria, Jon Irureta filosofoa eta Peio Monteano historialaria. Aranzabal ekonomialaria Federiko Krutwig jakintsuari buruz mintzatuko da; Irureta, berriz, euskal politikaren makaleriaz;eta Monteano, azkenik, Belatz kapitainaz.
