Gureberriak laugarren liburua argitaratzear dago, Zapalkuntzatik askatasunera, E(u)sklabo alaiak eta Aztihitza atera ondotik. Sugarren mende du izenburutzat liburu berriak; Asisko Urmeneta du egile, eta Erroak argitaletxea eta Lapurdi 1609 elkartea bidelagun direlarik aterako da.
“1525etik 1616ra bitarte sorgin-ehiza andana egin zuten Nafarroa guztian, Erronkaritik Sakanaraino. Eta, Logroñoko prozesua baino urte bat lehenago, Lapurdi guztira ere hedatu zen jazarpena.
Guk orduko herritarren tragedia kontatuko dugu, bere testuinguru historiko eta geografikoan, ezin baita ahantzi Euskal Herria bera mugalde bilakatzen ari zela bi inperio absolutisten artean.
Zigorturiko euskaldunak ez ziren bazterkinak, baina garai hartako lider sozialak: horretarako eraiki zen sorginen sekta kolektiboaren mitoa, buruzagi haiek bidetik kentzeko, ezohiko prozedurak baliatuz”.
Datorren igandean (irailaren 6an) aurkeztuko dugu liburua, Sarako Biltzarrean, Asiskoren eskutik.
Liburua fisikoki oraindik izango ez den arren, erosteko modua izango da. Gureberriak-ek stand propioa izango du Biltzarrean aurten ere. Animatu eta bertaratu!
